Канон всем святым, от века Богу благоугодившим, глас 4.

Тропарь, глас 2:

Апо́столи, му́ченицы и проро́цы, святи́телие, преподо́бнии и пра́веднии, до́бре по́двиг соверши́вшии и веру соблю́дшии, дерзнове́ние иму́ще ко Спа́су, о нас Того́, я́ко Бла́га, моли́те спасти́ся, мо́лимся, душа́м на́шим.

Кано́н святы́м му́чеником, и святи́телем, и проро́ком, и преподо́бным, [его́же краегране́сие: Све́тло похваля́ю Боже́ственныя Христо́вы дру́ги.] Творе́ние Ио́сифово. Гла́с 4.

Пе́снь 1

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́ я́ко в тимпа́не, во умерщвле́нии телесе́ побе́дное воспою́ пе́ние.

Припев: Вси святии, молите Бога о нас.

Светле́ется при́сно честна́я це́рковь, по́двиги све́тлыми госпо́дних страда́лец, и Христа́ возсия́вшаго Со́лнца от Де́вы, и тьму́ разгна́вшаго пре́лести, сла́вит почита́ющи.

Восхва́лим ве́рно Христо́вы святи́тели, изря́дныя лю́ди упа́сшыя до́бре, и све́тло да похва́лим собо́р ве́сь преподо́бно пожи́вших, и теле́сныя сла́сти умертви́вших ду́хом.

Слава: Кре́пость от Бо́га жена́м дарова́ся, в посте́ и кре́пком страда́нии врага́ попра́вшым благода́тию: те́х моли́твами, Го́споди, и проро́к святы́х Твои́х ми́лости Твоя́ все́м низпосли́.

И ныне, Богородичен: Избавля́я на́с от осужде́ния пе́рваго, Сы́н Бо́жий, благоизво́ли, Чи́стая, и Сы́н бы́ти Тво́й. Те́мже и всыни́вшеся Тебе́ ра́ди небе́снаго благослови́м Отца́, пою́ще Тебе́.

Пе́снь 3

Ирмо́с: Лу́к си́льных изнемо́же, и немощству́ющии препоя́сашася си́лою: сего́ ра́ди утверди́ся в Го́споде се́рдце мое́.

Я́коже а́гнцы добропобе́днии му́ченицы, заколе́ни бы́вше, Христу́ принесо́шася, закла́вшемуся а́гнцу и сло́ву Бо́жию за все́х избавле́ние.

Уста́ Бо́жия бы́вше священнотаи́нницы, от недосто́йных изведо́ша досто́йныя, уче́ньми свяще́нными просвеща́юще.

Слава: Обре́те преподо́бных сосло́вие, воздержа́ния ра́ди пи́щу неиждива́емую, наслади́вшеся зре́ньми и Боже́ственными восхожде́ньми.

И ныне, Богородичен: Хвалу́ Бо́гу принесе́м, от Де́вы ро́ждшемуся пло́тию, и же́н ли́ки а́нгельским лико́м совоку́пльшему.

Седален, глас 6.

Го́споди, святы́х Твои́х па́мять дне́сь показа́ся, я́ко ра́й, и́же во Eде́ме, в не́й бо ра́дуется вся́ тва́рь: и подае́ши на́м те́х мольба́ми ми́р и ве́лию ми́лость.

Сла́ва, и ны́не, Богоро́дичен: От се́рдца воздыха́ния и от утро́бы приношу́ Ти. Твое́, Всенепоро́чная, молю́ благопремени́тельное заступле́ние: поми́луй всестра́стную мою́ ду́шу, умоли́ многоми́лостиваго Бо́га изба́вити мя́ суда́, и е́зера о́гненнаго, Еди́на Благослове́нная.

Пе́снь 4

Ирмо́с: Седя́й в сла́ве на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щыя: сла́ва, Христе́, си́ле Твое́й.

Свяще́ннейшее просла́вися му́чеников сосло́вие, свяще́нно просла́виша у́ды свои́ми Го́спода, от все́х А́нгел сла́вимаго: и мо́лятся изба́витися на́м от вся́кия ско́рби.

Ум невеще́ственнаго светозаре́ния сия́ющ, иму́ще Боже́ственнии святи́телие, но́щь вся́кия пре́лести разруши́сте, и неле́стным наставле́нием наста́висте Богоизбра́нное ста́до Христо́во к ра́зуму.

Слава: Украси́ся преподо́бных многочи́сленное мно́жество, и возвели́чися Боже́ственных же́н еди́нственное торжество́, и проро́к почте́ся собо́р святы́й, со а́нгельскими собо́ры соедини́вся ра́дуяся.

И ныне, Богородичен: И́же Де́ву Тя́ сохрани́в по рождестве́ нетле́нну, де́вы вся́ Тебе́ обстоя́щыя просла́ви: с ни́миже непреста́нно моли́ся, спасти́ся от вся́кия ско́рби и напа́сти душа́м на́шым.

Пе́снь 5

Ирмо́с: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения, ве́рою воспева́ющыя Тя́.

Возноси́ми на Кре́ст и колесы́ сокруша́еми, ссеца́еми же на у́ды кре́пцыи му́ченицы, Бо́гу яви́шася не отсе́чени.

Спаси́телие ве́рным, святи́телие бы́вше, приведо́сте а́гнцу и влады́це, и́хже пасти́ преподо́бне вве́ристеся.

Слава: Мяте́жей мирски́х отлучи́вшеся, преподо́бнии, умири́сте сердца́ от страсте́й, и все́х Бо́гу сы́нове бы́сте.

И ныне, Богородичен: Бо́г в Тя́ всели́вся, Пречи́стая Де́во, соде́ла челове́ки Своея́ Сла́вы Боже́ственная жили́ща.

Пе́снь 6

Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в: но я́ко Бо́г из глубины́ возведи́ живо́т мо́й, Многоми́лостиве.

Я́ко прече́стно ка́мение му́ченицы, по земли́ прему́дро валя́ющеся, злоче́стия зда́ние все́ низверго́сте, и хра́мы Бо́жия бы́сте.

От руки́ наси́льственныя спаса́ете подру́чники вся́, святи́телие, пра́веднии и преподо́бнии, и́же о Христе́ ста́до соблюда́юще: сего́ ра́ди ублажа́етеся.

Слава: Рече́нием проро́ческим после́дующе, же́н мно́жество, во страда́ниих же и в посте́, от жены́ Де́вы возсия́вшему, Бо́гу сло́ву угоди́ша.

И ныне, Богородичен: Усты́, и язы́ком, и се́рдцем испове́даю Тя́, Отрокови́це, Бо́га на́шего Чи́стую Ма́терь: и Твои́м хода́тайством изба́ви мя́ ве́чнаго осужде́ния.

Кондак, глас 8:

Я́ко нача́тки естества́ Насади́телю тва́ри, вселе́нная прино́сит Ти, Го́споди, богоно́сныя му́ченики: тех моли́твами в ми́ре глубо́це, Це́рковь Твою́, жи́тельство Твое́, Богоро́дицею соблюди́, Многоми́лостиве.

Икос:

И́же по всей земли́ му́чившиися, и на Небеса́ пресели́вшиися, и́же стра́сти Христо́вы подража́вшии, и стра́сти на́ша отье́млющии, зде днесь собира́ются, перворожде́нных показу́юще Це́рковь, я́ко го́рния о́браз содержа́щу, и Христу́ вопию́щу: Бог мой еси́ Ты, Богоро́дицею соблюди́ мя, Многоми́лостиве.

Пе́снь 7

Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же благослове́н еси́.

Влады́ки Христа́ освяще́нныя сосу́ды, це́ркве забра́ла и столпы́ Госпо́дни му́ченики в весе́лии души́ воспои́м согла́сно.

Святи́телие Христо́вы, и преподо́бных все́х ли́к Боже́ственный ра́дуется с вы́шними си́лами: те́х моли́твами, Христе́, спаса́й пою́щыя Тя́.

Слава: Терпе́ние благо́е же́н преподо́бне и страда́льне просия́вших и ве́рою по́стничествовавших, Е́ву послуша́нием уязви́вшаго низложи́.

И ныне, Богородичен: Пла́мень и́же купину́ дре́вле не опаля́ющий, ви́дя законополо́жник, науча́шеся о́бразу Рождества́ твоего́, Богороди́тельнице Де́во, при́сно благослове́нная.

Пе́снь 8

Ирмо́с: Изба́вителю все́х Всеси́льне, посреде́ пла́мене благоче́ствовавшыя, снизше́д ороси́л еси́, и научи́л еси́ пе́ти: вся́ дела́ благослови́те, по́йте Го́спода.

Святи́телие, проро́цы, и му́ченицы, свяще́нный по́двиг сконча́вшии, свяще́нное улучи́ша водворе́ние со А́нгелы: с ни́миже про́сят очище́ния на́м все́м и ве́лия ми́лости.

Просвети́вшеся ду́хом преподо́бнии, бесо́вскую тьму́ погуби́ша: с ни́миже священному́ченицы, и святи́телие, проро́цы с пра́ведными, Бо́га во хвале́нии сла́вят.

Слава: И́же пре́жде безу́мием хваля́йся погуби́ти зе́млю и мо́ре, жена́ми всегда́ попира́ется, страда́нием же и посто́м послужи́вшими Бо́гу со усе́рдием.

И ныне, Богородичен: Ми́лости Твоея́ сподо́би мя́, благоми́лостивное Сло́во ро́ждшая, Богороди́тельнице Влады́чице, и вопию́ща мя́ спаси́: вся́ дела́ благослови́те Госпо́дня Го́спода.

Пе́снь 9

Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови Благослове́ние процвела́ еси́: Те́м Тя́ вси́ велича́ем.

Ви́девше Боже́ственныя да́ры му́ченицы, и по́чести прие́млюще вели́ких свои́х боле́зней, ра́дуются Христа́ велича́юще, си́х вои́стинну возвели́чившаго, и победоно́сцы показа́вшаго.

Я́ко святи́тельствующе лю́дем, поста́влени бы́вше святи́телие Богопропове́дницы, я́ко просвети́вшеся посто́м, со́лнца светле́йше преподо́бнии просия́сте, ве́рных озаря́юще де́л вели́ких явле́нием.

Слава: Со священному́ченики ку́пно, и со все́ми проро́ки, ублажи́м вся́ преподо́бныя и пра́ведники, и жены́ све́тло угоди́вшыя, те́х мольба́ми, Христе́, вопию́ще: изба́ви гее́нны ду́шы на́шя.

И ныне, Богородичен: Я́вльшися вы́шних херуви́м Всенепоро́чная превы́шши, я́ко ро́ждши содержи́теля вся́ческих, вы́шши у́м мо́й соде́лай, на стра́сти плотски́я укрепля́ющи мя́, влады́чняя твори́ти хоте́ния.

Молитва

Боже святый и во святых почиваяй, трисвятым гласом на небеси от Ангел воспеваемый, на земли от чело­век во святых Своих хвалимый: давый Святым Твоим Духом комуждо благо­дать по мере дарования Христова, и тою поставивый Церкви Твоей святей овы Апостолы, овы пророки, овы же благовестники, овы пастыри и учите­ли, их же словом проповеди. Тебе Самому действующему вся во всех, мнози совершишася святии в коемждо роде и роде, различными добродетельми благоугодившии Тебе, и к Тебе нам образ добрых подвигов своих оставивше, в радости прешедшии, готови, в нем же сами искушени быша, и нам напаствуемым помогати. Сих святых всех воспоминая и их бого­угодное похваляя житие, Тебе Самаго, в них действовавшаго, восхваляю, и онех благотворения Твоя дарования быти веруя, прилежно молю Тя, Святе святых, даждь ми грешному последовати их учению, паче же Твоею вседействующею благодатию, небесныя с ними сподобитися славы, хваляще пресвятое имя Твое, Отца и Сына и Святаго духа во веки. Аминь.